شعر کوچ از شام شاهکاری از مرحوم خوندل
زینب او گونکه عازم کوی نگاریدی
آغلار گوزیله دشت غمه رهسپاریدی
یعنی خرابه شامیدن ایستردی آیریلا
اوز زلفی تک گونوز گوزینه لیل تاریدی
اوّل مخاطب ایلدی شامین خانملارین
ظاهرده قصدی آیریلیقا اعتذاریدی
فرمایش ایلدی سیزه وار بیر سفارشیم
بو شهریده اگرچه غمیم بی شماریدی
بیز ایمدی کوچ ایدوب گیدیروخ بو دیاریدن
بو گیتماقا بو قافله بی اختیاردی
شوق وطن چکور آپارور دوزدی چون وظن
بو باغری قان اولانلارا یثرب دیاریدی
وار بو یول اوسته کعبه ی آمالی زینبون
بو کعبه کعبه نین شرف و افتخاریدی
عشق حسینیله گیدورم کربلایه من
بیر یردی عشق گللرینون لاله زاریدی
چوخ گل وار اوردا خاصّه گل سینه ی بتول
هر ناامید اولان کسین امّیدواریدی
بیرده بو قیز که گوشه ی ویرانه ده یاتوب
عشق اهلینون قرار دل بی قراریدی
پوزقوندی قبری گرچه محقّردی ظاهراً
معناده کاخ عاطفه بنیانگذاریدی
بیر آبرودی خلقتی سیمای خلقته
شامین خصوص عزّتیدی اعتباریدی
دنیانی دولدورار بو قیزین شان و شهرتی
بو شهرین ایمدی گرچه غریبه مزاریدی
بیر غنچه گلدی، گلشن عشق و محبّتین
باد مخالفیله سولان گلعذاریدی
هر لاله اولسا صحنه ی گلشنده داغ دل
گویا بونون نشان دل داغداریدی
یوخ چاره آیریلام گرک امّا گیدنمورم
گوگلوم کمند عشق و محبّت شکاریدی
قویماز کسم علاقه می قلبیم علاقه سی
گویا بونون مواهب پروردگاریدی
روحیم قالار خرابه ده گیتسمده، چون بو قیز
جاندان عزیز قارداشیمون یادگاریدی
شهزاده دی، رعیّتی نون غصّه مرگیدی
افتاده دی محبّتی نون خاکساریدی
آیری دوشوبدی جبریله ائلدن قبیله دن
غربت اسیری گوشه ی عزلت فکاریدی
قبرین بیله حقیر گوروب سانمیون حقیر
بیر نازلی قیزدی گلشن عشقین هزاریدی
چوخ یر گزوب خرابه نشین اولدی عاقبت
بولدوم که گنج عشقه دُر شاهواریدی
ازبسکه پا پیاده دولانموشدی چوللری
گلبرگ تک ایاقلاری مجروح خاریدی
حسرت باخاردی چوللره جان تاپشوران زمان
بیر اکبر آدلی قارداشینا انتظاریدی
آهو باخیشلی گوزلری آغلاردی ابر تک
دلدن اگرچه درد و غمه بردباریدی
آغلاردی، آغلامازدی که شمره اسیر اولوب
شرح جنایت ایتماقا اشکی نثاریدی
آغلار گوزیله نازیله حسرت باخیشلاری
رشک نگاه آهوی چین و تتاریدی
گل پیکرین قویاندا بو پوزقون مزاره من
گوردوم که یاسمن گلینون نوبهاریدی
بیر سرّیدور، بو نکته نی بیگانه آنلاماز
مفهومی آشنای بلا آشکاریدی
غارتده کربلاده آلینموشدی زیوری
مقهور ظلم فرقه ی بی ننگ و عاریدی
ویرموشدی باشه عمرینی ویرانه ده ولی
گلبرگ تک وجودی هله زخمداریدی
هر چند باد ظلمیله سولموشدی گل یوزی
امّا او توزلی زلفی گینه مشکباریدی
اشکین توکردی گل یوزینه ابر تک مدام
بیر مقصدیله درد و غمه سازگاریدی
مینلر بنای ظلمی ایدر گوزیاشی خراب
قصر یزید گرچه جفا پایداریدی
آخِر بو کاخ جوری یخار سیل اشکیله
عمرینده چون بو نیّتیله اشکباریدی
بیر گون پوزار بو سلطنت جابرانه سین
عالم بولر که کیمده اولان اقتداریدی
دنیاده گون بو گوندی بیله فرض ایدور یزید
اوز بختینون گورور که هله کامگاریدی
عصرین امامین اُلدوروری افتخار ایدور
وار تاج و تختی خوش گونی خوش روزگاریدی
محبوس ایدور خرابه ده آل پیمبری
بولمور نه قدری گوز گجه شب زنده داریدی
ازبسکه مست باده ی دنیای پستیدی
شعر و شراب و زن گجه گوندوز شعاریدی
میزانِ رشد عقلینی شرم ایلورم دیم
سگ هم غذاسی یا که جلس کناریدی
اسلامه ظاهراً اوزینی پیشوا بولور
معناده گچه جور و جفا تاجداریدی
اولماز حرامزاده مسلمانلارا امیر
اسلام روحی بو عملین شرمساریدی
بیر قان توکوبدی آنلامیوب قدر و قیمتین
بولموب بو قان او قاندی که اللهه ثاریدی
بی اعتنا بولر اوزینی روز محشره
بیر گون گورر که منتقمین گیر و داریدی
فکر ایلمور که زود گیدر دور سلطنت
دنیا مثالی عمر و گونون جویباریدی
انکار ایدور نزولینی وحیین پیمبره
حشر و حساب منکری، بی بند و باریدی
یوخ اعتقادی محشره ظلمین جزاسینه
مست شراب شهوت و غفلت خماریدی
محصور ایدوب مخالفه دشت عراقیده
اهل حجازی، گو که اولار زنگباریدی
اشیاخ بدرین ایستور آلا انتقامینی
آل رسول دشمنی شرّ شراریدی
خوندل هانی یزیدین او قصر مجلّلی
فرش و حریر پرده لری زرنگاریدی
بیر نچّه گوندی ظالمه فرصت زمانه ده
دنیانین عیش و عشرتی ناپایداریدی
معرفی سبک های عزاداری هیئت های حسینی ، مداحان ، شاعران و وعاظ تبریزی